أغضبت أمي ........وشوفوا وش صار لى
في يوم من الأيام ......كنا أنا وزوجي بالبيت نتابع التلفزيون ,وكان زوجي حبيبي بجنبي يداعب شعرى,مره يلفه على أرقبته ,ومره يشمه ,ومره يمسح فيه وجهه.
فقال:-عمرى ....ودى أشوفك بالشعر القصير,وشلون بصير شكلك,أكيد بتجننين.
قلت :-وش تقول تبيني أقص شعرى ....والله تذبحني أمي.
بعدها سكت ما علق على ردى ؟
وفي يوم كنت طالعه من الحمام {عزكم الله } وقاعده أنشف شعرى وزوجي بالغرفه يراقبني ,وفتح معاي نفس الموضوع .
وقال:-والله نفسى أشوفك بالشعر القصير,مانى قادر أتخيلك ,أكيد بتطلعين غير .
قعدت أضحك على كلامه وقلت :-أشفيك يا حبيبي هالموضوع مو قادر أطلعه من راسك؟ ليه شعرى ما يعجبك !
قال:-أفا عليك وشلون ما يعجبني ,ألا مجنني ,بس كان نفسى بالتغير شوى.
التغير....التغير !!!!!!!!!هذى الكلمه أصدمتنى وأشغلتنى وخلتنى أفكر بكلامه .[التغييييييييييييير]!!!!!!!!!!!!!!!!!!!!!!!!!!!!!!!!!!!
صارحت أختي {مرايم ] بالموضوع وطلبت رأيها .
فقالت :_ هذا الموضوع مافيه نقاش ,المراه السنعه [يعني الشاطره ] هى اللى تسمع كلام زوجها وتنفذ رغباته ,يله روحي بس وقصى شعرك مثل ما يبى زوجك ,وألا تبينه يطالع بغيرك .
قلت :-خليني أول أشاور أمي .
قالت:-لا ...طيعيني والله ما راح ترضى , سوى لها مفاجئه وحطيها تحت الأمر الواقع.
قلت :-لا لا ...ما أقدر بكلمها أول .!!!
قالت :-كيفك ...تحملى النتيجه !!!
رحت لأمي وكانت قاعده تسمع الراديو أدور منى طالب .
وقلت :- يمه ...بخاطري أقص شعرى ؟؟؟
خزتنى بذيك الخزه طيرت لى قلبى .
وقالت :_ شنو .. وش قلت ....والله أن قصيتيه لا أقص رقبتك , وما أكلمك ولا أسلم عليك بعد.
قلت :_ يمه زوجي يبينى أقصه يبيني أغير من شكلى .
قالت :- والله أن هذا الخبل {محشوم زوجى حبيبي } صج أنه مو كفو النعمه ,فسقان هذا {يعني شبعان } ولا فيه أحدعنده هالنعمه ويرفسها .
قلت :- يمه الله يهداك كل شعر وراح يطول بعدين ,أنا بحياتي ما قصيته خليني هذي المره بس .
قالت :_ يا بنتي يا حبيبتي ...كل البنات تتمني الشعر , يمك [وتعني أمك بالعاميه ] الشعر نعمه وزينه للمراه , يمك ..تعوذي من الشيطان الرجيم .
رديت عند أختي مرايم وقلت لها اللى صار مع أمى .
قالت :- قلعتك [يعني تصطفلي ] تستاهلين اللى جاك ما قلت لك لا تقولين لها , بس هبله ما طعتيني .
قلت :_يبه [وهو لفظ عام يطلق علي العموم ولا يقصد منه الأب ]يبه
خلاص ما الله قاسم هذا ما راح أقص شعرى .
قالت أختي مرايم :_من صجك [يعني من صدق كلامك ]تبينها تصير بنفس زوجك يالهبله ,طيعيني إذا هذا يفرح زوجك سويه ما لك شغل بأحد .
قلت :_ لا يا مريم والله ماني مزعله أمى علشان شعر ,بس طاب خاطري من هالموضوع .
قالت :_ ما عليك أنا أقدر على أمى راح أقنعها بطريقتي وأهديها ,وأفهمها أن زمانهم غير زمانا .
بعدين لا تنسين أن أمى تسمعلى وتأخذ بكلامي .
وقعد الشيطان يوسوس برأسى وطبعا بمساعدة أختى مرايم اللى ما قصرت ...صارت تحن ....وتحن {يعنى تزن } على راسى ليما أقنعتني أروح لصالون التجميل .
وهناك ...وفى ذاك اليوم المشئوم والساعه اللى مو مباركه {أستغفر الله } طلبت من العامله بالصالون أنها تقص شعرى كاريه فرنسى ....كاريه !!!!!!
تصدقون العامله أنصدمت لما شافت شعرى .
وقالت :_ مدام حرام يقص شعر أنتى كاريه ..شعر أنتى حلو واجد وطويل مدام والله حرام .
وأختي الشريره مرايم معاي طبعا ردت على العامله وبغت تاكلها .
وقالت :_ هيه أنتى ..مالك شغل ياله قصى شعرها وخلصينا ...ناقصينك أحنا بعد.
طبعا صوت أختى الشريره صديقة الشيطان كان عالى خلت كل اللى بالصالون ينتبه لنا .
وكان من ظمن الحريم مرأه كبيره شوى جايه مع بناتها ,وكانت تراقبنى تبى تشوف أنا شنو راح أسوي .
ولما بدت عاملت الصالون بقص شعري خيم الهدوءعلى اللى بالصالون صاروا كلهم يطالعون فيني .
ويوم بدى القص يزيد ويتعدي الورك ثم الظهر وبعدين الأكتاف , قامت المرأه الكبيره وجاءت عندى , تدرون شنو قالت لى ؟؟؟
قالت :_ الله يحر عدوك مثل ما حريتينى ....وانا مانى أمك !!!!!!!
لا وحسايف هالجدايل الشقر , بس أجمعى شعرك اللى على الأرض لا تخلينه بالصالون .
وراحت وهى تتحلطم , أه ...أه ... لو تعرفون وش صار لى , حسيت أن الأرض تدور فيني وانى مخدره بعد قصة الشعر وبعد كلام المرأه .
والله أنى ما فرحت بالقصه مثل باقى الحريم اللى يطلعون من الصالون وهم مبسوطين .
أنا لا ..لا ..حسيت كأنى مسويه جريمه وجريمه لا تغتفر , وبذات كلام هالمراه خلانى أتخيل ردت فعل أمى .
وقام وجهى يعطي ألوان وما قدرت أرد على اللى يعاتبونى بالصالون أو حتى أحط عينى بعينهم.
حسيت بالحياء .....أيه ...الحياء , ماأدرى ليه كانت أحاسيسى غريبه وعجيبه ما حسيت بهالمشاعر قبل هالمره .
لما أنتهت العامله من قص الشعر وتصفيفه , جاءت لى أختى مرايم الشريره تحاول تلطف الجو وقالت :_ أشوف ...أشوف ...الللللللللله والله أن شكلك يجنن, بسم الله عليك تهبلين وش حلاتك .
ما رديت عليها لأنى ما كنت حاسه بأحد . كنت مصدومه ومرعوبه وتفكيرى مشوش .
قالت الشريره ....طبعا عرفتوها أختي مرايم :_ وش في وجهك يا حظي كن ميت لك أحد ...علامك مبوزه [يعنى مكشره ] وش صار يعنى كله شعر وراح يطول .
يييييييله قومى بس بروح للبيت , والله مكبره الموضوع وهو تافه .
قمت وأنا أحس أن جسمى ثقيل , ما قدرت حتى أحرك رجلييني , وزين وصلت للسياره .
وطول هالطريق وهذى الشريره تحن وتزن على راسي .
وهى تقول :- ما عليك أهم شئ رضى زوجك , الحين يا كبر فرحته لما يشوف النيولوك الجديد بيستخف عليك صدقينى !!!!!!!!!
يا مالك الخفه أستاهل يوم طعتك ,طبعا هذا الكلام اللى قلته بصدرى ولا وش يفكنى من ألسان هالشريره .
المهم ....وصلنا للبيت وكانت أمى بالصاله , وقالت لى الشريره مرايم :-دخلى وخليها تشوفك , والله راح تغير رايه لما تشوف حلاتك .
رحت أمشى للصاله وأنا خطواتي ثقيله , خطوه قدام وخطوتين ورى .
دخلت الصاله بمساعدة الشريره اللى جرتنى للداخل .
وكانت أمي تتقهوى {يعنى تشرب القهوه } ولما شافتنى أشرقت بالقهوه وطاح الفنجان من يدها .
وصاحت !!!!! عمري ما سمعت أمي تصيح مثل هذى الصيحه , وطقت أيدينها براسها و قالت :_ لا واغميضه [يعنى حسافه بالعاميه ] لا واغميضة ذاك الشعر ...يا ويلى عليه ....يعنى لحقتي على رايك وقصيتيه [يعنى نفذتى كلامك ] سويتيها وأنا حالفه عليك
الله يسامحك ....أغضبتى قلبى وضيعتى حلفى [ يعنى قسمى].
قلت :_ يمه أ.........
قالت :_ كب ولا كلمه ...[يعني السكوت أحسن ] مابى أسمع منك ولا كلمه ولا أبى أشوفك .
ومشت وراحت لغرفتها , وانا وراها أحاول أنى أراضيها وأقنعها أنه شعر وبيطول بعدين .
حركت أيدينها بطريقه ....يعنى يلا ولى عنى , وسكرت باب غرفتها بوجهى .
رجعت للصاله وأنا حاسه بالندم والحسره والقهر , وكانت الشريره مرايم تتقهوى وتأكل حلو [يا علها ما تحدره ] [يعنى ما تبلعه ] وبكل برودة العالم قالت لى :_ تعالى يالخبله تقهوى وحلى وعدلى مزاجك ...ما عليك راح أطخ بعدين وترضى عنك , لا تخافين أمي طيبه وما تتحمل زعلك .
قعت بالصاله وأنا بدنيا ثانيه كأنى مخدره ومصطوله على قول أخواننا المصريين .
مو عارفه شاسوى , وفجأه ....صاحت علي صديقة أبليس مرايم الشريره وخرعتني بصوتها العالي وهي تقول :_ هييييه ...هييييه..أنت يا حظي لا تقعدين جذي [يعني هكذا ] ..روحي وسنعي نفسك [يعنى رتبى هندامك ] وأكشخى [يعنى تجملي ] الحين رجالك جاي [يعنى زوجك قادم ] خلصى لا تنحين جذي [يعني تنصطلين ]
المهم لبست وأستعديت لزوجي اللى الله يسامحه كان السبب بزعل أمي علي .
ركبت السياره وأنا مو على عادتى [يعني طبيعتي ] هادئه وساكته كني بلعت لساني .
بدا يتكلم ..ويلاطفني ويسألني عن أهلى وأحوالهم , وأنا ما عندي غير كلمة ...زين ...كل شئ ..زين [ قلبت هنديه ] وهو بعد عمري حس فيني وسألني :_ هاه ...عسى ما شر ...شفيك , منت علي عادتك , عسى الأهل ما فيهم شئ , قولي لي يا عمري ...وش صاير !!!! وش فيك ؟؟؟؟؟
قلت :_ لا ..لا.. ما في شئ ...بس أنا مصدعه شوي [يعني أعاني من صداع ] .
بعد أنا مسكينه ...ما ألام ..دام عندي أخت مثل مرايم الشريره , أكيد بيجيني صداع .
هاه .....أكمل لكم ....القصه ...............
قال :_ يا ... بعد ... راسي والله , بسم الله عليك من الصداع , الحين يا قلبي نوصل للبيت وأعطيك بنادول , وأسوى لراسك مساج , وإنشاءالله ما لك إلا العافيه .
أه...أه ...مساج ...مسسسساج , طبعا الحين أسهل بعد قص الشعر !!!!!!!!!!!!!!!!!!
وصلنا للبيت ودخلت للغرفه أنزل عباتى, وأرتب نفسي شوى , وصاحبنا بالصاله يطقطق بالريموت كنترول , ولا يدرى باللى صار .
ترددة وشلون بدخل عليه ..والله مستحيه ..... أفييييييييييه
تصدقون ما كنت فرحانه بالعكس كنت أحس بالنقص ...والخجل ...مو عارفه وشلون أوصف لكم شعوري بذيك الساعه .[ يعني هذه الساعه ].
ييييييييله ...أرد وأكمل لكم أحسن ....................
دخلت عليه بالصاله وكانت ردة فعله ....مجننننننننونه , خرعني وصاح وهو يقول :_ واو... واو....ما شاء الله ....ما شاء الله .... قمر 14 .
وصار يدور فينى بالصاله ويلفني مره يمييين ومره يسار...لما دوخني .
طبعا خليته ذاك اليوم يستمتع بالنيولوك الجديد , ويتمتع بحلاله اللى شرعه الله .
بس صراحه أنا كنت بمود ثاني ما حسيت بالسعاده ولا الراحه , ولا قدرت أنام , بس أتقلب على المخده .
زوجى حس أن فينى شئ وحاول المسكين يتغشمر معاى [ يعنى يمزح ] وقال:_ هاه ...الحلو مو عارف ينام ..الظاهر مشتاق لشعره .
وعسى المسكين ما جاب طارى الشعر ...و لا أنا ..أبطها بكاء ... وصياح , ما قدرت أمسك نفسى , خرعت المسكين , ما يدرى وش فيني .
قال :- أفا...أفا... عسى ما شر أشفيك , وش صاير , ليه كل هالبكاء , ردي علي عسى ما يعورك شئ ؟؟؟؟؟؟
قعت وحكيت له كل السالفه واللى صار لى مع أمي وزعلها علي .
والله يخليه لي ويسامحه بكل برود قال:- لا ... لا ... كلش ولا زعل الوالده , وانتي الله يهداك , يوم أنها ما هي راضيه ....ليه تقصينه ؟؟؟؟؟؟؟؟؟؟؟؟؟؟؟؟؟؟؟؟
رفعت راسى , وطالعت فيه , وبعدين مسحت دموعي وقلت :- لا والله ....الحين يوم سويت اللى يرضيك ... تعاتبني ... وتحط اللوم علي .
أنت السبب ...كله منك أنت اللى حنييت على راسى أبى تغيييير ....أبى تغيييير.....أها ...أها...أها.....[ يعنى كملت بكائى ] .
حاول المسكين يهديين وقال:- خلاص يا بنت الحلال ....باكر من الصبح تروحين للوالده وتبوسين راسها وتعتذرين منها , وإنشاء الله ترضى عنك ويصير كل شئ تمام .
والله ذيك الليله ما غمضت عيني , بس أعد الساعات متى يطلع الصبح , وأروح لأمي وأعتذر منها .
http:///fashion.fsaten.com http:///forum.mn66.com http:///www.almraah.com/وصلنا ...للجزء المهم ...في القصه ...أكمل لكم ....
جاء الصبح وأنا على طول لبست عباتي... وطياران لبيت أهلي , دخلت عليهم وإذا أمي نايمه بالصاله , وأخوانى وخواتي عندها .
قلت :- وش فيكم ..وأمي وش فيها ...وش صاير !!!!!!!!
رد علي واحد من أخواني وقال :- لا تخرعين يا بنت الحلال ما في شئ , بس البارحه أتعبت أشوي مرتفع عندها الضغط , وديناها للمستشفى , والحمد لله , عطوها أبره , وحبه تحت اللسان وحطوا لها أدرب , وهذه طيبه ما عليها شر .
يوم شفت أمي بهذي الحال طحت عليها , أبكي وأنا أبوس أيدينها .....لحظه ...ما ني قادره أكمل ......................
وأبوس راسها وأنا أقول لها : _يمه ...سامحينى يالغاليه , يمه والله ما أعودها ولا أعصيك بشئ , بس لا تزعلين علي .
أنا يا يمه ....السبب بلى صار لك ...سامحينى يا يمه ... الله يخليك لي .................
ظمتني أمي وهى تبكى وتمسح علي راسى ظمتنى لصدرها حيل .
[أف ...هذا أصعب جزء قدرت أكتبه ...بالقصه ] ........
طبعا الحين كل اللى بالبيت دروا بالسالفه , وأعرفوا بأنى السبب بمرض أمي , وما سلمت من تعليقاتهم , ونغزاتهم .
وهذي حكايتي مع قص الشعر .......لحظه ! بقول لكم شئ مهم .........
تدرون أن هذي الحكايه صار لها خمس سنوات .....!!!!والشئ المهم ....شعرى ....!تدرون ..وش صار له ؟؟؟
ما رضى يطول ....{عقر} على قولة أمي [يعنى صار عاقر ].
سبحان الله ...هذا لأنى عصيت أمي وأغضبتها , أمي اللى هى جنتى ...وناري , أمي اللى هى باب من ابواب الجنه ........
كلمه أخيره ....وهي عباره عن نصيحه أقولها إلى كل اللى يقرأ موضوعي .....
[ كله ولا غضب الوالدين ....وتذكروا ...أن رضى الله من رضى الوالدين .
تكفون ...لا تزعلونهم على أشياء ....تافه, أشياء ...دنيويه , ترى والله خسارتهم كبيره ما تعوض , وما يحسها ...إلا ..فاقدها .
والله ..يخلي لي أمي ....وأمهاتكم .......ولا يحرمنا منهم ].
ودمتم سالمييييييين ....................
